KEYNOTE ADDRESS by Hon. Minister of Sports and Recreation at the official launch of the 36th Digicel Marist International Sevens

SAMOA, June 6 - (7 June 2024 – Tanoa Tusitala Hotel, Sogi)

Lau Afioga i le Taitai o le Sauniga

Lau Afioga i le Tamaitai Palemia

Minisita o le Kapeneta

Amepasa ma Komesina Maualuga

Sui o Faalapotopotoga

Peresitene o le Kalapu Taalo a Malisi

Mamalu o le Malisi ua Potopoto

Faapea Tumua ma Pule,

O paia o Samoa ua taoto ae o se ala oo. E afua mai Saua seia paia Analega, o Samoa ua uma ona tofi. E le o se atunuu taliola. Ua iloga foi ona Aiga, Taeao ma Malae tausi. Ua tū talatala foi ona Tumua, Pule ma fetalaiga. Tulou.

Ae o le avanoa lenei o se faamanuia a le Malo o Samoa i le faamoemoe lona 36 o le Taitoafitu Faavaomalo a le Kalapu Taalo a Malisi Sagato Iosefo i Samoa. O le manulauti ma le faamuamua a le Malo, o le atinae o taaloga. O le ala foi lea ua faatuina ai e le Malo o Samoa le Matagaluega mo Taaloga, ia mausali ma mautū se lagolago i le atinae o taaloga i le atunuu. O Faiga faavae ma alafua ia maoti ma taoto i lagotonu lona faatinoga. Ia fatufatu foi le sootaga o le Matagaluega ma kalapu taaalo faapea asosi o taaloga. A mautu le faavae lea, ona tatou vaai lea i ni taunuuga lelei ma faamalie loto e pei ona iai taaloga fava-o-Malo ua ausia e Samoa.

E lei mamao atu Taaloga a le Pasefika na faia i Solomona. Lea na mata’ina ai foi le taumafai a au taaalo a Samoa. Ae iloga foi le sao o nisi o tama fanau a le Kalapu taalo a Malisi sa faafailele i ana taamilosaga e pei o le Susuga ia Ato Faoagali, ua saofagā mo le Paris Olympics 2024 ia Iulai. Pine auro le tatou Au Liki o loo faavae atu taamilosaga a le Rugby League Samoa ma le soosoo tauau ma le Marist League 9’s. Sa maualuga foi le taumfaiga a le Lakapi Pa’I a Samoa lea sa faamanuiaina I pine auro e 3 mo le uluai taimi mai lea faamoemoe ma sa iai foi le sao o le taamilosaga pa’i a Malisi. E faapea foi ma le au Netipolo a Tamaitai sa faamanuiaina I le pine apamemea. E le toe fesiligia le tulaga o le Taitoafitu a Samoa e iu ona feagai ma luitau i le taimi nei. Ae o le vaega taua, ‘Aua ne’i mate le faamaite, le faamaopopo ma le tauaveina o taamilosaga faapenei, e faaauau ai le atinae o taleni.

O lea ua tatou molimauina le a’e manuia o le Au Fusu a le Kalapu Malisi na auai atu i taamilosaga Fusu a Niu Sila. E 6 pine auro na maua mai ai. O fuafuaga nei, e faamoemoe i le tofa mamao ma le utaga loloto e le mō nei ae o le silasila mamao mo a taeao. Ou te faamalo i le vaai mamao na mafua ai le INTERNATIONAL SPORTS YEAR a le Kalapu Taalo ia le gata i le lakapi, ae ua faaaofia ai ma le Netipolo, Lakapi Pa’i, Fusuaga, Lakapi Taitoafitu, Lakapi Liki. Aua ne’i pu moomoo le vaai. Ae ia faalautele maea ma pou o lou faleie e pei ona molimau le Tusi Paia, “a leai se vaai mamao, e fano le Nuu” Faataoto 29:18.

Faafetai i lo outou faataua ma le amanaia o le sao o Tamaitai i totonu i Taaloga. O faamaumauga, o le 2018 na amatalia ai le taamilosaga a Tamaitai i le Fitu a Malisi seia oo mai le Asō. O fuafuaga uma faapenei, e le gata i tama ma teine taaalo, ae faapea foi i Faiaoga, Pulega ma alii ma tamaitai laufali. O se avanoa e faaleleia ai tomai ma agavaa. O se aoaoga mo outou e ala i tulaga manaomia ma Tulafono faavaomalo i le faatinoga o le taaloga ma taamilosaga.

E manuia faamoemoega o le Malo pe afai e lagolago atu le atunuu e ala i le taumafaiga o tatou polokalame atinae mai afioaga ma kalapu. O taaloga e le na o ni taamilosaga, ae o avanoa mo galuega ma le siitia ai o le tamaoaiga pe a lelei ona faatino.

I le avea ai ma Minisita o Taaloga, oute faamalo atu I lau Susuga i le Peresitene ma le Kalapu a Malisi mo taumafaiga uma. Ma ia manuia le Taamilosaga Faavaomalo lona 36 o lau Taitoafitu.

SOIFUA MA IA MANUIA

Ata Pueina – Malo o Samoa (Peseta Tusiga Taofiga)